Ministério dos Transportes e Comunicações: Loron Tersa-Feira, 29/08/2023, Ministru Transporte no Komunikasaun, Eng. Miguel Marques Gonçalves Manetelu, vizita servisu fatin Teknolójia Informátika no Komunikasaun (TIK) Timor, hodi husu mós atu halo servisu koordenada ho Diresaun Nasionál Informasaun no Komunikasaun (DNIK).

Prejensa Ministru Transporte no Komunikasaun, Eng. Miguel Marques Gonçalves, akompaña husi Diretór TIK, Roberto, hodi haree direitamente server TIK nian, inklui servisu monotorizasaun TIK nian durante ne’e.

Husi konversa ne’ebé Ministru Transporte no Komunikasaun tatoli hela ba dirijente TIK katak, presiza halo koordenasaun servisu ho DNIK para ba oin ne’e labele iha kompetetivu ba objetivu ida de’it. Maibé oinsá buka ajusta malu servisu atu oferese rezultadu ida ne’ebé maka di’ak iha area Informasaun no Teknolójia nian.

Uluk TIK tutela hela Primeiru Ministru nia okos, DNIK iha Ministeriu Transporte no Komunikasaun nian maka ladun iha komunikasaun no koordenasaun sevisu, maibé iha Governu da-IX tutela hotu ona Ministeriu Transporte no Komunikasaun.

Entaun ba oin tuir Ministru Transporte no Komunikasaun, husu para TIK ho DNIK tenke apoiu malu servisu, TIK presiza ajuda DNIK ba apoiu servisu TIK nian, bainhira DNIK presiza ajuda TIK, TIK tenke ba apoiu para servisu ne’e la’o ho di’ak no koordenada.

Ita nia país ki’koan hela, ema uitoan, rekursu umanus mós uitoan, fahe malu tan? Ida ne’e maka ita nia problema, labele polítiza tekníku sira, tanba ne’e maka ba mandatu Ministru Transporte no Komunikasaun, governu da-IX nian sei buka Instituisaun sira halo servisu koordenasaun para hodi fó rezultadu di’ak no iha responsabilidade.

Iha Mandatu Ministru Transporte no Komunikasaun ne’e la hasai kompetensia TIK nian, nafatin, la hasai buat ruma, enkuantu DNIK mós sei nafatin, importante maka tenke iha koordenasaun servisu, Ministru Transporte mós husu parte rua ne’e bainhira iha buat ruma la’o naksalak la’o ba malu hodi buka solusaun, “Importante Servisu hamutuk, koordenasaun, tenke la’o ba malu, la presiza gia de marsa, nakloke ba malu de’it, servisu kompleta malu, la’ós atu hadau malu servisu”.informa Ministru. (MEDIA MTK)